السبت، 29 ديسمبر 2012

الطريق الى المجهول..

لمّا كنت بطريقي لإلك.. خربشت اني بطريقي للمجهول..
بس لمّا شفتك هاد الإحساس اختفى.. 
لأنه كان في احساس بالآمان.. احساس حلو ومريح.. 
بس بآخر فترة، مش عارفة ليش.. رجع هاد الإحساس..
اني بطريقي للمجهول.. المبهم.. المش مفهوم ضمنًا.. 
بديش أوقع كمان مرة.. ملّيت وزهقت من هالوقعات.. 
بديش ألملم حالي كمان مرة.. لأنه زهقت.. 
بدي اكون مبسوطة.. 
مش أكثر. 






السبت، 1 ديسمبر 2012

الوقت

بعمري ما فكرت انه رح اكتب اشي عن هاد الموضوع.. بس آخر فترة عم بنتبه عحالي قديش مهم عندي الوقت..
يعني.. بحاول انه ولا ولا ولا مرة اتأخر عموعد.. بعيّن المنبه حتى بأيام العطلة.. بفكر ايش ممكن اعمل بالوقت الي بستنى فيه وانا اعمل بشغلة ثانية.. وهيك أمور..
بس آخر فترة عم بسافر بالقطار كثير.. من تل ابيب لحيفا.. من حيفا لتل ابيب.. من تل ابيب لبنيامينا والعكس.. فصرت احسب هاد الوقت بعدد الاغاني الي بسمعهن عالطريق.. مثلا.. من حيفا لتل ابيب ١٤-١٥ اغنية.. من عزريئيلي لبيتي مشي ٦ أغاني.. من بيتي للجامعة ١٠-١١ أغنية..
طبعًا الاشي بختلف.. حسب الاغاني ومدتهن.. بس انه فجأة صار للوقت طعم ثاني.. أحلى وممتع اكثر..
وكل ما طالت السفرة زادت المتعة :)

الأربعاء، 10 أكتوبر 2012

إنه الخريف حتمًا!

الخريف.. هاد الفصل الي مش عارفة ايش بدو مني.. بعشقه!
يمكن عشانّه مثلي.. مش عارف ايش بدو.. ومش عارف يوخد قرار!
مرة بكون بردان.. ومرة بكون مشوّب.. 
مرة سعيد.. مرة حزين.. 
بس عالأغلب اللون الأصفر هوّي الّي بطغي عليه.. 
سألت حالي اكثر من مرة..
ليش أغلب الناس ما بتحب الخريف؟ 
ليش بحبّوا الربيع والخريف لا؟ 
في أحلى من منظر الخريف؟ فش :)
الخريف يمكن الفصل الوحيد الي بنجح يفوّتني بحالة خاصة..
بالذات مع الموسيقى.. 
بدوّر
وببحبش
على موسيقى تلائم الطقس.. بس بفشل.. 
لأنه هاد الطقس متقلّب بالزبط بقدر تقلّب مزاجي!
وبالنسبة للمزاجية.. فـَ آه.. انا مزاجية ومن الطراز الأول!
وشو يعني؟ شو فيها؟ ليش الكل بكره هالصفة؟ 
واذا يعني مزاجية؟ واذا عندي القدرة اقلب من مزاج لمزاج بسهولة؟ 
بصيرش؟ 

شايفين كيف كنت احكي بالخريف وفجأة صرت احكي بالمزاجية؟
رهيبة انا شو أفكاري مشتتة!
آخ بس!


الثلاثاء، 31 يوليو 2012

تو واتش ليست!

١. بيروت بالليل
٢. ميكروفون (اه بعدني مش حاضرته، ويا فضيحتاه!)
٣. ليموناضة
٤. حدوثة
٥. المتبقي
٦. طيارة من ورق
٧. أمريكا
٨. Exils - Tony Gatlif
٩. Swing - Tony Gatlif
١٠. A Clockwork Orange
١١. Monamour

وبعد في كمان.. كل هاي الأفلام موجودة عندي بس بدها حدا يحضرها.. تبًا للامتحانات!

الثلاثاء، 22 مايو 2012

أنطي-إيفريثينج!

اليوم حاسّة حالي ضد كل اشي بالعالم:

موسيقى، فايسبوك، تويتر، تلفون، ناس، تلفزيون، أفلام، ضجة، اصحاب، ورقة، قلم، أكل، شرب، نوم!
كلشي! كلشي! 


واااااااااااااااااااااااااااااع!!!!!!!!





الثلاثاء، 15 مايو 2012

بتنرفزني وبتعصبنّي وبتطلّعني عن ديني الناس الّي بتستغبيني وبتستغفلني!

الأربعاء، 29 فبراير 2012

فترة انتقالية

عادةً.. بحبّش هاي الفترات.. ال-ما بين بين.. 
من الفصل الاول للفصل الثاني
من الشتا للربيع
من بيت لبيت
من حارة لحارة
هيك يعني.. شوشرة قايمة قاعدة.. كله مع بعضه.. 
يعني كمان اكم يوم ببلّش السمستر الثاني ومعه بتبلّش التخبطات.. 
وكمان اسبوعين بدي انقل بيت.. وحارة.. ونمط حياة.. 
يعني زي كل سنة بدي اضطر الملم حالي واتأقلم من جديد لوضع جديد.. 
زهقت.. 
وخايفة.. 
هاي المراحل الانتقالية بتخوّف.. بتخوفني انا عالأقل.. 
مش عارفة اتعامل مع هاي الامور كلها.. كلشي بضيّقلي خلاقي.. حتى الطقس! 
حتى الطقس مش عارف وين الله حاطّه.. حتى الطقس متحيّر.. حتى الطقس مش مساعدني.. 
طبعًا مش بس هاي الامور الّي مش عارفة اتعامل معها.. 
كمان مش عارفة اتعامل مع حالي انا.. شو انا؟ وشو بدي؟ شو بديش؟ 
طيب.. كيف ببلّش؟ قصدي.. كيف ببلّش الملم حالي واوخذ قرارات؟
انا بدي اكس وبديش واي؟ 
طب واذا بدي اكس وواي وبعرف كثير منيح انه بنفعش مع بعض؟ 
افلّتهن الثنين؟ 
طب بدي اترك كل هاي الشغلات الي انا مش فاهمتها..
في اشي جديد بصير بحياتي.. دخل حياتي بشدة وعنف كمان.. وبعدين؟ 
خايفة أهَربُه من حياتي.. أطلِعُه بسبب اللا مبالاة تاعتي الّي بتقضي علي شوي شوي وبتبعد كثير ناس عني.. 
مش عارفة مالي ومش عارفة كيف احافظ على الشغلات الي بتهمني. 

الليلة.. زي كل ليلة.. رح انام وانا اتسائل هاي التساؤلات على امل يكون عندي اجوبة بكرا.. ومتمسكة بجملتي المشهورة - بصير خير - لأنه اذا بديش احط ايماني بهيك امل.. فكيف بدي اكمّل المشوار؟ 

وبالنهاية بقول - غدًا يوم افضل. 

السبت، 11 فبراير 2012

تودو ليست!

١. الاقلاع عن الدفاية
٢. الاقلاع عن العمل يوم الجمعة
٣. الاقلاع عن العمل يوم السبت
٤. الاقلاع عن العمل بالسوبر-فارم
٥. الاقلاع عن المسلسلات الكورية
٦. الاقلاع عن الأفلام الهوليوودية الكوميدية-رومانسية-هبلة
٧. الاقلاع عن قراءة الكتب البوليسية
٨. شرب الكثير من الماء
٩. تناول الڤيتامينات
١٠. تناول الحديد
١١. تناول الطعام (وجبات عقد حالها ومحترمة، مش بمبا!)
١٢. النوم ٨ ساعات فما فوق
١٣. النوم حتى ساعات متأخرة
١٤. الكسل ثم الكسل ثم الكسل.
١٥. التقليل من كميات السكر.
١٦. التقليل من كميات الملح.

خلص بكفي.. بس أتذكر كمان اشي بحتلن الليست.

السلام عليكم!

الاثنين، 6 فبراير 2012

مدوّنتي العزيزة..
بعرف اني حيوانة..
بعرف اني لئيمة..
وبعرف اني بستغلّك وقت ما احتاجك وبتركك وقت ما القى حدا غيرك يسمعني..
بس بالآخر انت الوحيدة الّي ممكن عنجد تسمعيني بدون اي مقابل وبدون اي نكد.. :) مهوي عشان هيك بحبك.. 
ممكن اسألك شو بقدر اعمل عشان احس احسن هاي الليلة؟ 
عم بحس اني كثير سلبية الليلة.. مضغوطة.. امتحانات وقرف ودنيا.. وتغييرات بحياتي مش عارفة اذا انا قدها.. 
انه.. ممكن يصير اشي بحياتي يغييرلي اياها كلها هيك 180 درجة. 
انا جاهزة لهيك اشي؟ مش عارفة.. بس ميتة يصير..!
ميتة اعيش تجربة جديدة بحياتي.. تجربة لإلي انا.. 
 وبعدين.. ليش هيك بحس هاي الحاجة احكي مع ناس معيّنين؟ انه ليش؟ ليش فش شي آلية تمنع هيك اشي؟ 
بالمختصر المفيد.. 
يا حنان.. يا عزيزتي :)
ما الك الّا حالك.. 
وبتمنّى انا حنان لحنان التوفيق بكرا :)

يالله تصبحي على خير عزيزتي المدونة..