الاثنين، 8 يوليو 2013

امتحان قبول

اليوم كان امتحان القبول للطلاب الجدد في قسم العمارة بالجامعة.. بس شفت الممتحنين رجعت بالذاكرة لقبل ٦ سنين.. وقت ما كنت مثلهم ومحلهم.. حاملة دوسيّة الكرتون بحجم ٥٠ على ٧٠ الي طلبوها مني.. مع شوية اوراق بيضا للرسم وأقلام رصاص.. 
بس شفتهم بستنوا يفوتوا الغرفة الي رح تقررلهم مستقبلهم، اتذكرت حالي.. خايفة، متوترة، بحاول احافظ على ثقتي بنفسي.. هاد الاشي الوحيد بالإضافة للموهبة الي ممكن يمرقك بهيك امتحان.. 
اتذكرت حالي كيف فتت على الغرفة واخذت ورقة الامتحان.. قرأتها مرة.. قرأتها كمان مرة.. وكمان.. مصطلحات غريبة بالعبراني مكنتش متأكدة إذا فاهمتها او لا.. مصطلحات اول مرة بتعامل معها بالرغم من تمكّني الممتاز باللغة العبرية.. ممكن افهم معنى المصطلح بس كيف ممكن أرسمه؟ 
إتذكرت انه أخذلي وقت أفكر ايش بدي ارسم اكثر من عملية الرسم نفسها.. 
اتذكرت كيف انه طلعت مبسوطة من كيف فكرت وشو رسمت.. 
اليوم انا هون.. بنفس البناية.. بعد ٦ سنين من التعليم والكد والتعب.. برجع لورا وبقول لحالي.. "ولاااااااو!" ولاو شو مرقت شغلات.. حلوة ومرّة.. ولاو شو مستعدة ارجع محلهم.. ارجع سنة اولى وثانية وثالثة ورابعة وخامسة وانبسط من كل لحظة ولحظة بالتعليم..
ولاو وين انا اليوم.. بعيدة ١٦ يوم عن تسليم مشروع التخرج.. ١٦ يوم بتفصلني عن مشروع جديد رح يبلش بحياتي.. ١٦ يوم لنهاية ٦ سنين حسيت فيهن بكل يوم وكل ساعة.. ١٦ يوم للإستقرار.. ١٦ يوم لتغيير الستاتوس من طالبة فن معماري لستاتوس فنانة معمارية :)
١٦ يوم :)